د افغانستان د تروریزم او ډیموکراسۍ مطالعاتو مرکز (ACSTD) د افغانانو په مشرۍ، یو خپلواک، اینده نګر، پالیسي او اقدام محوره بنسټ (تنک ټانک) دی او اساسي موخه یي په افغانستان او سیمه کې د تروریزم، افراطیت او تاوتریخوالي په څیر جدي ننګونو او د ډیموکراتیزه کیدو، ټولنیز-سیاسي فعالیت او ټولنیز مقاومت په څیر پیچلو موضوعات په اړه هر اړخیزه مطالعه او څیړل دي. موږ د دقیقو او مستندو څیړنو او پالیسي جوړولو مشورو په اساس عملي، واقعي، او تطبیقېدونکې حل لارې وړاندې کوو. همدارنګه، زموږ هڅې پر ظرفیت لوړونې، ستراتیژیک تعامل او ټولشموله ډیالوګ باندې متمرکزې دي څو زموږ فکر او نظر د عمل جامه واغوندي. دا بنسټ هڅه کوي څو د ناامنۍ، تروریزم، او افراطیت پر وړاندې مؤثرې حل لارې پیدا کړي، او په ورته وخت کې د دموکراتیکو ارزښتونو، ټولنیز-سیاسي ګډون، ټاکنو، او سیاسي بهیرونو ملاتړ کوي. دا مرکز په اکادمیک او عامه بحثونو کې د تحقیقي او علمي خپرونو، برنامو، او د مشترکو همکاریوو نوښتونو له لارې رغنده رول لوبوي.

که څه هم د ACSTD مرکزیت، او ریښې افغانستان دی، خو له نړیوالو سره وصل او همکار دی. موږ د دولتي ادارو، مدني ټولنو، او اکادمیک بنسټونو په شمول له ملي او نړیوالو شریکانو سره له نږدې کار کوو. زموږ اصلي تمرکز افغانستان دی، خو د جنوبي آسیا په څیر سیمه ایز تحولات هم تر پوښښ لاندې نیسو. زموږ هلې ځلې په لاندې درې ستنو ولاړې دي، چې زموږ د تعهد (د افغانانو په مشرۍ، له داخله راټوکېدلی بدلون، د افغانستان د روښانه راتلونکې لپار). څرګندويي کوي.

الف) تحلیلي څېړنه او پالیسي مشورې: زموږ هدف دا دی څو عامه بحثونو کې علمي او اګاهانه رول ولوبوو، پالیسي جوړونه کې مخکښ واوسو، او د هغو موضوعاتو په اړه چې موږ پرې تمرکز لرو، عملي او مؤثرې حللارې وړاندې کړو. موږ هڅه کوو داسې تحلیلونه او حل لارې وړاندې کړو چې هم پر محلي واقعیتونو ولاړ وي، او هم سیمه ایزو او نړیوالو شریکانو ته اړونده او ارزښتناک وي.

ب) ظرفیت لوړونه او ستراتیژیک تعامل: موږ باور لرو چې د افغانستان راتلونکی د افغانانو په ځانګړي ډول زده‌کوونکو/محصلینو، نويو څېړونکو، سیمه‌ییزو مشرانو، او د مدني ټولنو پر پیاوړي کولو پورې اړه لري. ACSTD ځانګړي او هدفمند روزنیز، مشورتي، او علمي فرصتونه برابروي څو د ځوانو رهبرانو، مدافعینو، او بدلون راوستونکو نوی نسل وروزي. خو زموږ هدف یوازې تر ظرفیت لوړونې محدود نه دی. د ستراتیژیک تعامل له لارې، موږ له ملي او نړیوالو شریکانو سره له نږدې کار کوو څو د څېړنو او د پالیسیو تطبیق تر منځ واټن له منځه یوسو څو مفکورې او پالیسیانې په عینی، مثبتو او اندازه‌کېدونکو پایلو بدلې کړو.

ج) رغنده ډیالوګ او بحثونه: په یوه ویشل شوې ټولنه کې، ډیالوګ یو مهم رکن دی.  ACSTDهڅه کوي څو داسې یوه خوندي، عادلانه، او پرانیستي فضا رامنځته کړي چې پکې بېلابېل غږونه سره راټول شي، خپلې ننګونې او نظرونه شریک کړي، او د حللارو په اړه فکر وکړي. موږ پر مختلفو پلټفورمونو غور کوو لکه عامه او پرانیستې غونډې، تخصصي بحثونه، د زده‌کوونکو او محصلینو پروګرامونه یا ټولنیز بحثونه څو ډیالوګونه او بحثونو ارزښت پیدا کړي او ګډون اختیاري نه بلکې ضروري وګڼل شي. زموږ هدف دا دی چې متقابل درک رامنځته کړو، قطبونه او کرکه راکمه کړو، او په ټولو افغانانو کې ګډ مسؤلیت، هویت او راتلونکي لپاره مشترک احساس پیاوړی کړو. موږ باور لرو چې د افغانانو ترمنځ د کرکې او اختلافاتو راکمولو تګلاره پر واقعي درک، او پرانیستو او دوامداره ډیالوګ ولاړه ده.  

دا مرکز د ذدخلو بنسټونو د تقویي او د اوږدمهاله مثبت بدلون رامنځته کولو په موخه تاسیس شویدی او د صداقت، ټول شمولیت، خپلواکۍ او اغیزو په څیر ارزښتونو ته ژمن دی، او لدې لارې په افغانستان کې تلپاتې سولې او ډیموکراټیک پرمختګ لپاره هلې ځلې کوي.