نن ورځ افغانستان په یو مهم او خطرناک پړاو کې واقع دی او د خپلې راتلونکې لپاره د دوو متضادو لیدلورو تر منځ راګیر دی. له یوې خوا، له تاوتریخوالي ډک افراطیت، استبداد، او د مدني ازادیوو نابودي ورځ تر بلې پراخیږي. له بلې خوا، د افغانانو ځپل شوی ولې مقاومه نسل چې د ولسواکۍ، تنوع، او فرصتونو پر ارزښتونو باورمند دی، لا هم هیله‌ لري څو خپل غږ او حق بېرته ترلاسه کړي. له همدې امله، د هېواد سیاسي-ټولنیز جوړښت تر بل هر وخت زیات مات شوی بریښي. خو دغه درز یا اختلاف تصادفي نه دی؛ دا د څو لسیزو داخلي جګړو او بهرنۍ مداخلې پایله ده چې سخت‌دریځي یا سخت دریځ فکرونه، کور دننه نارضایتي، وسلوال بغاوت، سیاسي محرومیت او غچ اخیستنه یې له مهمو فکټورونو څخه دي.  

موږ دې ایدیالوژیک درز ته یوازې د یو سیاسي اختلاف نه، بلکې د هویت، مسیر، او د ژوند د هدف لپاره د یوې ژورې مبارزې په سترګه ګورو. زموږ نوم — “تروریزم او ډیموکراسي” — پخپله دا دردناکه دوه‌قطبي فضا او نړۍ منعکسوي، خو له دې هم مهم دا چې دا نوم زموږ تعهد څرګندوي: موږ هوډ لرو څو دا درز راکم او له منځه یوسو.

د دې بنسټ مشري افغانان کوي، خپلواک او اینده نګر دی او د وخت غوښتنو سره سم د روانو برخلیک ټاکوونکو بحرانونو پر وړاندې یوه نوې، عمل‌محوره حل لاره وړاندې کوي. دا چې افراطي نظریات د بنسټیز کیدو او ټینګیدو په حال کې دي او د ولسواکۍ فضا ورځ تر بلې تنګېږي، موږ— دریمه لار— نښلوونکي لوبغاړي یو او زموږ تګلاره پر سمو څېړنو، واقعي پالیسي محوره مشورو، ستراتیژیک تعامل او معنی لرونکو محلي او نړیوالو همکاریو ولاړه ده.   

موږ ارادتآ یو خپلواک بنسټ یو— چې رهبري یې د افغانانو نوی نسل پر غاړه لري؛ هغه نسل چې په عمل او فکر کې یې هیڅ ډول سیاسي تړاو او پخواني اختلافات ځای نلري. په داسې یو وېشلي افغانستان کې، موږ د ګډو ارزښتونو د رامنځته کولو لپاره دا بیړنۍ اړتیا درک کوو. موږ د طرف او خوا نه، بلکې د حل‌لارو په لټه کې یو.

له همدې امله، زموږ موخه د افغانستان لپاره د یو نوي روایت جوړول دي — داسې یو روایت چې له وېش او نفرت څخه خالي وي، معنی لرونکي ډیالوګ ته زمینه مساعده کړي، او د ټولو افغانانو راتلونکی، هویت، او فرصت د حل لارو مرکزي تمرکز وګرځي.